馬國明擔心湯洛雯佗住B跌親

無綫花旦湯洛雯與馬國明愈愛愈甜，日前馬國明亮相陳敏之的網上頻道，大爆女友大頭蝦、多甩漏，已經擔心定對方將來大肚會跌倒：「佢好大頭蝦，成日唔見文件，我反而好整齊，啲好緊要嘅信會收埋。我成日都話佢，如果第時我哋有仔女，嗰啲考試證明書你全部都唔見晒，出世紙都可以唔見。我都好擔心佢，佢有時行行吓街都跌親，如果佢第日大肚，如果有呢個機會……（驚佢仆親？）係呀！都唔知點算好。」又透露會去外國行禮，最好是海邊和「陽光與海灘」，兩口子連婚禮都Plan好，相信好事近！