食老本申請專利 瑪莉亞擬做聖誕女王 音樂人反對獨霸

有傳媒爆料指瑪莉亞上月向美國專利及商標局申請，將「聖誕女王」（Queen of Christmas）及「聖誕公主」（Princess of Christmas）等名字註冊成商標，全因為去年美國音樂雜誌《Billboard》形容她為「無可爭議的聖誕女王」，不過她申請專利的做法，被美國兩位音樂人Elizabeth Chan和Darlene Love極力反對！

Elizabeth去年曾推出《The Queen of Christmas》大碟，Darlene亦於2018年推出過同名大碟。據知，Elizabeth已透過律師入紙反對瑪莉亞申請專利，她受訪時說：「聖誕係所有人嘅事，應該要同人分享，並唔係個人擁有，瑪莉亞咁做係唔啱。」她深信瑪莉亞並非純為音樂而註冊商標：「佢會嘗試出酒類商品、衫同口罩等。」

至於Darlene日前於社交網批評瑪莉亞：「瑪莉亞真係將『聖誕女王』註冊成商標？即係代表我唔可以用呢個稱號！早於29年前大衞利達文（David Letterman）已稱我為『聖誕女王』，比起瑪莉亞推出《All I want For Christmas Is You》早1年。我已經81歲，唔會改變任何嘢。如果瑪莉亞有咩問題可以打畀大衞或我個律師！」

不少網民亦看不過眼寸爆瑪莉亞：「瑪莉亞乜嘢女王都唔係」、「佢打算食老本食一世！講真首歌並唔係最佳嘅聖誕歌」、「唔好咁貪心啦瑪莉亞，你已經乜都有啦！」