朱千雪目標生3個 陳豪贈言：一嚟就好快

陳豪與朱千雪昨晨到尖沙咀出席美容活動，陳豪不諱言：「作為藝人有責任貪靚，即使我再懶，老婆都會提醒同幫手，佢係專家。」他更打趣在貪靚方面，自己醒覺得遲：「遲到好過冇到，容貌嘅嘢後天努力可以改善。（依家點搞先得？）好似棵樹咁，得閒淋吓水、曬吓太陽，等佢極速生長，哈哈！」

朱千雪則透露自從轉職後，反而可花更多時間顧及美容，並說：「今年係我入行10年，有個願望想回復10年前嘅狀態。（平時有幫老公護膚？）佢都好懶，最好我話畀佢聽搽咩，甚至幫佢搽，我都比較多護膚品，有時同佢開心share。」

陳豪下月將夥拍太太陳茵媺開拍新劇，演情侶兼有大量對手戲。談到太太復出，他說：「講咗好多次，我哋唔想喺螢光幕合作，咁會冇晒fantasy，不過監製搵老婆傾咗好多次，我哋都相信佢。（兩個一齊開工，3個仔女點算？）到時佢哋都開學，好啲囉！不過平時佢哋啲schedule，我哋都要花時間去處理。」朱千雪聞得陳豪與陳茵媺「合體」即大呼期待，又自言並非已沒有戲癮：「尤其媽咪喺加拿大煲劇，我都想佢睇到個女喺螢光幕出現。（造人未？）隨緣啦。（向陳豪取經？）媽咪都係有3個女，可以嘅話我都想。」陳豪即搞笑謂：「有啲嘢一係唔嚟，一嚟就好快喇！（有乜傳授畀朱千雪？）Enjoy your life！」