啤牌對戰 強弱懸殊 吳若希老公威番次 自殘振夫綱

平時嘻嘻哈哈的吳若希，來到Poker枱上仍改不了大笑姑婆本色，更多番以「聲殺」來轉移老公Alex、主持方力申及郭偉亮（Eric）的視線，可惜每次都被老公一眼睇穿，更慘成三子圍攻及狂踩的對象。Eric問Alex老婆在家中是否一樣的笑聲不絕？Alex停頓數秒苦思後竟爆出一句：「佢喺屋企咆哮多啲。」

雖然在不少場合被老婆「食住」，但今次Alex為了振夫綱，於Poker枱上多次激動地表示不介意自殘，來力證對愛妻睇通睇透，當中包括兩度大叫：「你（指吳若希）有蛇我切！」更厲害的是他連吳若希手持甚麼牌也瞭如指掌：「佢笑到咁，我同你講，佢一定中咗隻三！如果佢係三條，佢唔講嘢㗎喇。」被老公連環「踢爆」的吳若希全程只能「以笑遮醜」。

除了玩牌盡顯兩人搞笑潛能，他們還分享了獨特的「夫妻的世界」，當Alex被問到遭老婆勁窒有沒有底線時，他搞笑回應：「尊嚴一早喺拍拖時已經冇咗，因為我有少少（享受）被虐嘅感覺，咁啱我老婆係鍾意虐待人嘅。」吳若希聞言即反擊指老公「自己攞嚟」，兩公婆一個願打一個願捱，果然是天作之合！