候選港姐集訓林泳怡退賽陳瑞菱粉底遮疤：復發機會低

應屆港姐候選佳麗昨日出發進行特訓，不過卻由原本20人變19人，年僅19歲的林泳怡以學業理由宣布退賽。「抗病鬥士」陳瑞菱不介意手術疤痕曝光，稱復發機會微。

2022年香港小姐候選佳麗昨日由電視城出發往愉景灣接受特訓，港姐統籌經理何小慧透露前一晚接到林泳怡通知退賽：「佢以學業理由退選，佢今年19歲要升大學，話參加唔到準決賽同決賽。（會唔會安排候補佳麗？）星期一同曾志偉、樂易玲商量，到時再公布。」對於梁超怡有紋身，她稱面試時已知道，認為紋身面積細，可接受。而陳瑞菱因曾做割腫瘤手術，在胸下至肚皮位置留下長疤痕，她指不會為她刻意設計泳衣遮掩：「條疤望落唔係太驚嚇，佢經歷生死都可以企出嚟，畀人正能量感覺。」

陳瑞菱表示穿泳裝時會用粉底遮掩疤痕：「但我唔介意畀人睇到，條疤已經係我身體一部分，提醒自己珍惜生命同勇敢去追夢。我有做激光去疤，相信做多幾次就會冇晒。好感恩執番條命，醫生話只要保持健康同開心，復發機會好低。」而梁超怡坦承手腕有紋身，為尊重場合會以粉底遮掩，並解釋：「有個從小認識嘅好朋友離世，當時我喺美國趕唔切見佢最後一面，所以紋身紀念佢。」她謂不擔心因而影響參賽：「名次唔重要，重要係過程，我會努力增值自己做得更好。」2人都為林泳怡退賽而感可惜，讚對方是開心果。

邵初關楓馨入營「陪訓」

林鈺洧稱由於要減肥，故帶了半個行李箱的水果去特訓。張光怡對於被指是無綫高層樂易玲的世侄女，跟對方兩位兒子由細玩到大，她即否認：「我哋只係喺某個場合見過，影咗張相，唔係好熟。」

另外，應屆港姐邵初、梁凱晴及關楓馨會跟隨師妹一同特訓，她們會跟佳麗進行互動，分享心路歷程及擔任主持。