被爆享「特權」多人服侍 周嘉洛兜巴星 陳瀅唔敢還拖

周嘉洛、陳瀅、朱敏瀚、王灝兒（JW）、張頴康及麥美恩等昨日出席無綫劇集《痞子殿下》宣傳活動，席間播出劇集的拍攝花絮，打扮性感的陳瀅爆料指一場被嘉洛掌摑的戲份原定是借位拍攝，沒料正式埋位時對方竟出盡力摑她，令她來不及反應，頓時眼濕濕：「本來諗住就住打或者避鏡頭，點知佢真係打落嚟！不過我喺劇入面成日打佢，都冇所謂，我未試過畀男人打，嗰下真係出咗戲！（唔還手？）因為當時唔熟，如果熟咗之後拍，我會打番佢之後先再拍！」嘉洛表示有即時向陳瀅道歉，又指從未打過女人，反而試過太眼瞓而打自己。

首演男一的嘉洛兼唱主題曲，受訪時面紅紅，笑指聽到自己的歌聲感尷尬，陳瀅即「呷醋」指曾向監製自薦，可惜被「彈鐘」，又踢爆拍檔試過在化妝間睡着，劇組出動了3位同事服侍他：「一個托住佢個頭、一個幫佢整頭、一個化妝，我拍晒片㗎！」

至於剛宣布與余思霆和平分手的朱敏瀚心情不錯，他說：「我OK，分手最主要係因為疫情，長期分開，呢2年真正見面只得2個星期，覺得好難維繫。（有冇努力挽回？）有共識，我哋有傾有講，期間冇嘈過交，表現成熟。」更指彼此再見亦是朋友，將來會繼續支持對方。他坦言有不捨，但會向好的方向想，並指余思霆仍身在台灣，預計9月返港時再約見面，至於會否復合？他說：「做住朋友先，我哋都忙於工作，現階段做好眼前嘅嘢，再睇可以行幾遠啦！（分手有冇涉及第3者？）冇！」