波波密語：唔揀圈中人 偏遇上金剛 陳蕊蕊霎時心動 險踏兩條船

2004年入讀無綫舞蹈藝員訓練班的蕊蕊，近年投資開辦美人魚明星學院，又開設格仔舖賣首飾及護膚品，可謂百足咁多爪。事業發展順利之餘，感情方面亦多姿多采，先後與周秀娜舊愛陳偉成（Avis）及藝人金剛拍拖，雖然現時與圈外男友愛得癡纏，但講到與圈中人拍拖經驗，蕊蕊絕對有得分享。

談到與同行拍拖困難之處，蕊蕊坦言接受不了男友與其他異性有親熱鏡頭，故沒想過揀圈中人做男朋友，無奈緣分天注定，要來的始終會來：「有啲戲係要咁樣拍，佢會話咗畀我聽先，我唔會去睇，心裏面一定係唔舒服，套戲都唔會睇，不過好在嗰段時間真係冇啲好過分嘅戲。」

談到與金剛的一段情，蕊蕊透露其實於拍拖頭半年已經常有拗撬：「其實佢都大男人，不過對女朋友真係好好，只不過性格唔係好啱，大家都火爆，嗌交係唔會讓步。」雖然異性緣強，但蕊蕊揚言絕不會一腳踏兩船：「之前拍緊拖期間識咗一個新嘅男仔，發覺有少少心動，當刻醒覺要斬纜，因為唔係好接受到嗰種自己，總之男朋友只可以係一個。」更指於芸芸舊愛中，與Avis可以做到再見亦是朋友：「因為大家真係冇嘢！之前有一個行內男朋友，我知道佢好放唔低我，我就要好決絕，否則變咗好似吊住佢。」

而於《Thai多嘢講》環節，波波又再出招，一見泰籍華僑「年糕」便以泰文「孤Chop Mung」向對方示愛，惟聽到對方一舊雲，並即時糾正，指當中的「孤」字用作於即將以粗口罵人的前言，若然以該句說話向男友表白，定必適得其反。