變生酮達人 半年減30磅 崔碧珈邊食邊瘦多仔埋身

由演員變歌手的崔碧珈（Anita）曾重逾140磅，但奉行生酮飲食後，只花了6個月時間就能跟「脹爆」身材永別，5年來維持110磅，日前她接受專訪時，自信謂：「個胸係有少少縮細，但Cup數就差唔多。」

在眾多瘦身法之中，她堅持生酮飲食，因還有抗衰老、排毒的功效，她指該飲食法如開啟身體另一個模式，用燒脂肪做能量，所以每一啖呼吸、每一下心跳，都可消耗脂肪，故7日應可減磅，約兩周就見明顯成效：「第一階段係去水腫，將唔好嘅細胞排走，皮膚狀態都變好，瞓得好咗，人就會精神咗，全部都係我想要嘅好處。」

而Anita覺得最難得減脂不減口福，她指生酮飲食是戒糖及澱粉質，而和牛就是生酮法的福祉：「唔使計幾多分量嘅肉，可以無限食，我係朋友圈中食得最多安士和牛，仲可以食拖羅，同埋肥嘅肉，好似肥腩肉、肥豬肉、走醬東坡肉，我會飲好多水，間中會進行斷食。」亦可照常打邊爐，但拒絕醃製食物：「揀皮蛋芫荽湯底，會問清楚食物嘅製作過程，試過食足3個鐘。」甜品也不必戒，皆因她現學炮製生酮雪糕、蛋糕及麵包：「口痕都唔使太克制，口感上有8、9成似。」

對於坊間指生酮飲食易令人變憔悴，她對此並不認同，指任何減肥法不離戒甜和加大運動量，難免影響心情，她以過來人身份分享：「如果用生酮法就唔會咁樣，其實減肥嘅大前提係揀適合自己嘅方式之前，同自己做個心理輔導，準備好係條幾難行嘅路，要開心咁面對，同埋要有恒心。」

問到生酮飲食可有副作用？她笑言因要大量飲食，可能如廁多構成不方便。那麼可會影響其異性緣？她就話：「So Far，男朋友唔係用生酮嚟認識，反而仲容易識到男朋友，因為好多嘢唔食得，變相唔使點請你食飯。」