派唐詩詠水着祝捷陳豪以身作則操Fit透肌打頭陣

藝人陳豪與唐詩詠前日出席新劇宣傳活動，陳豪笑言若收視好，不介意性感上陣派福利，並委派拍檔詩詠着泳衣，但詩詠則反建議對方以單車褲示人，陳豪自認引人入勝。

由陳豪、唐詩詠、郭晉安及張曦雯等主演的無綫劇集《白色強人II》前日首播，大會前晚安排一眾演員於商場跟現場觀眾一齊收看首集。陳豪的上衣透薄帶點若隱若現效果，他講笑說：「為增加收視惟有去盡啲。其實我唔係刻意，不過近期大隻咗唔介意咁着。（可以再性感啲？）睇吓收視幾多。」問到若收視好，可會穿泳褲派福利？他即指着身旁的詩詠說：「叫佢着泳衣！」詩詠聞言將波交回對方：「有陳豪加入真係太好，啲性感任務交托佢身上，我想睇佢着單車褲。」陳豪笑着自誇會相當引人入勝。

陳豪又透露近期太太陳茵媺努力做運動並練出6塊腹肌，自己受對方感染也要勤加鍛煉，並自認一直都有6塊腹肌。詩詠大爆之前跟陳豪在深圳拍劇時，每天都會見到對方在健身室舉重：「我聽到佢叫嗰把聲，場內嘅健身教練都望住佢。」陳豪即自嘲舉最細的啞鈴，但叫最大聲，人未到聲先到。

郭晉安唔敢同張曦雯親密

另外，郭晉安與張曦雯在劇中飾演一對，講到親密場口，安仔笑言：「唔敢，我會緊張，佢係白色公主。（太太唔畀？）今日唔講佢，我會唔識講，我講笑咋！」他表示單靠對白及眼神已經營造到甜蜜氛圍。而張曦雯近期以長髮造型示人，被網民大讚女神終於回歸，她坦言：「我係為嚟緊套劇而駁髮，其實我長髮短髮都鍾意，睇角色需要，我冇所謂。（長髮短髮都係女神？）我自己覺得係。」