自揭選美鬧不和 梁允瑜：「我有整容」

梁允瑜去年參選港姐時連環爆是非，包括被指貪慕虛榮，連昔日的爆粗短片亦流出，因而被封「粗口港姐」。雖然最後10強不入，但她仍獲無綫簽約加盟，在最近開設的個人短片頻道中，她就分享參選港姐的點滴。

片中她以「男仔頭」形容自己，坦言當時與部分佳麗不和，但慶幸過程中亦獲得真友誼，識到好姊妹︰「你諗吓成班女仔，梗係有啲是是非非嘅嘢，咁舊年我參選港姐嘅時候都同佳麗有不和嘅，當然亦唔係得我嘅，其他人我都聽到八卦吓，知道吓咁樣啦。有時可能係睇唔過眼佢一啲行為，我就覺得啱傾就傾，唔啱傾咪有禮貌打個招呼算囉。不過都有真友誼，唔好睇到港姐係一個爾虞我詐，唔係你死就我活嘅心態，唔係咁樣嘅！」

加盟無綫後，梁允瑜直言因競爭大，要思考如何突圍而出：「TVB真係好大競爭！因為次次去到化妝間，素顏都有好多靚仔、靚女，但係我就唔會諗點樣上位，我諗應該係話點樣突圍而出。娛樂圈係你等待嘅時間好長，你需要等個機會來臨，所以你可以做嘅就係好好裝備自己，當機會嚟到就好好把握，做到啲成績出嚟，係對自己最好嘅交代。」

她又承認曾經「整容」，包括「啪骨」改善面形，又指視乎大家如何定義「整容」：「依家箍牙同整雙眼皮都係整容，如果箍牙都計，咁我係有整容嘅。以前我係爆牙同哨牙，我有打『黑眼圈針』，因為有千年黑眼圈。自己開心就足夠，整容唔會影響到其他人，最緊要自己開心同埋安全。」