物業放租暫住酒店高海寧搵新竇黎諾懿撩同居

女星高海寧透露目前暫住酒店，希望覓得合心水的安樂窩，黎諾懿即表示囝囝很喜歡高海寧：「我成日都叫你搬嚟同我個仔瞓㗎。」

高海寧（高Ling）、黎諾懿與謝東閔昨日出席由鄭裕玲（嘟嘟）、鄭衍峰及周奕瑋主持的新節目《樓價有得估》拜神儀式。早年成為業主的高Ling坦言要供款30年，目前作放租用途。身為包租婆的她自爆租住酒店：「我都想搵新租盤，希望搬到黎諾懿住嘅豪宅附近。」男方笑說：「我嗰頭好似冇乜細單位喎，我成日都叫你搬嚟同我個仔瞓㗎。」他指高Ling及李佳芯經常到其家探望兒子，甚得囝囝歡心。

寓所擺滿風水陣

黎諾懿表示太太喜歡買「磚頭」，但他沒有物業：「我得架車係我名，其他都冇。」又稱篤信風水，家中擺了不同的風水陣：「乜都有，要擺嘅都擺晒出嚟，龍呀鳳呀，阿仔都知道啲風水陣唔可以亂碰。」而高Ling覺得黎諾懿是人生勝利組，事業和家庭都好好。她亦篤信風水，將來買樓都會放風水擺設。問到是否想催旺感情？她笑言：「我要呀，搵到屋都會擺個桃花陣。」

被指投資有道的嘟嘟表示：「唔係，只係有樓住啫，我都係得一個自住物業。」首集會播出她30年前的舊居片段，但為保私隱，她坦言現時不會再公開寓所。她表示近年花心思布置家居：「以前會注重衣着，但依家覺得屋企最重要，每季換吓床單、被鋪之類用品。」