候選港姐做Gym波濤「胸」湧許子萱拉筋慘叫林鈺洧嗌眼瞓

新一屆候選港姐現正接受密集式訓練，日前眾佳麗穿上運動服接受健身訓練，大晒美好身材，但不少佳麗拉筋時即「現真身」，筋硬如鐵，拉筋拉到「喊驚」！其中，許子萱自爆筋骨最硬，坦言以後要加倍訓練！

《2022香港小姐競選》20位候選佳麗現正特訓中，各人於專業導師指導下學習化妝、健身，以求脫胎換骨！繼早前獲師姐陳凱琳教導選美貼士兼心理輔導後，日前眾佳麗穿上貼身運動服接受健身、瑜伽訓練，大騷美好身段，雖然外表攞滿分，但有些佳麗拉筋時卻依嘩鬼叫，明顯柔軟度不足，當中許子萱接受無綫娛樂新聞台訪問時「自首」，直認筋骨最硬，表示之後會勤力拉筋，她說：「我平時好少做拉筋，都係做器械多，所以比較緊。」而徐麟則表示：「我覺得器械動作睇落去好簡單，但做起上嚟就好難！」

邢慧敏靠化妝「修容」

談到節食話題，馮嘉敏自言從沒想過要節食，反而覺得「食多啲嘢」可以加快新陳代謝，至於梁超怡亦表示不會刻意節食，但會食得清淡，希望健康一點。至於上化妝堂時，張靜婷賣口乖指獲益良多：「尋日學咗五官點樣化妝靚啲，學完之後真係差好遠。」邢慧敏則自覺面形不夠尖，故要學化妝「修容」。

面對一連串密集式訓練，眾佳麗都毫無怨言，何思懿覺得雖然睡眠不足，但忙得開心，林鈺洧亦同意，更笑言：「真係幾眼瞓，返到屋企會好快瞓得着。」