游嘉欣坐巴士辣Pat Pat 陳煒巡遊暴曬 底褲都濕埋

視帝郭晉安昨日與陳煒、陳曉華及游嘉欣等出席無綫劇集《回歸》花車巡遊宣傳，眾人於起點向粉絲派禮物，之後乘開篷巴士途經銅鑼灣「出巡」，沿途不停向途人揮手，引來群眾歡呼聲，但於酷熱天氣下，眾星均曬到紅卜卜兼汗流浹背。

事後安仔孖住陳煒受訪，穿上透視裝的陳煒笑指頂唔順：「頭先全程企喺度，因為啲櫈晒到辣Pat Pat，底褲都濕晒！」安仔亦表示有穿底衫吸汗，問到烈日當空下暴曬是否很辛苦？他說：「有乜辛苦未試過，試過喺橫店開工，熱到隻雞蛋喺地下爆開。（試過中暑？）成日都有臨時演員暈低要抬走，我就會差唔多暈嘅時候飲正氣水，之後瞓半個鐘就冇事。」陳煒亦透露曾於拍劇時中暑。談到劇集收視，安仔寄望繼續上升，問到屆時將如何慶祝？陳煒豪言不介意三點式上陣，至於安仔會否泳褲上場？他即笑說：「睇咩年代泳裝啦，泳褲可以，我着樽領。」而將於日內搬新屋的陳煒表示，剛好近日不用開工，可以專心執拾。

至於忙為新劇《你好，我的大夫》開工的何廣沛，原定要缺席《回》劇宣傳，但最終也趕到終點站，於冷氣房會合大隊。

何廣沛笑說：「其實我都好想嚟，（巡遊）呢方面我係『A0』，想吸收維他命D，因為開緊劇，知道有時間就即刻趕嚟，見你哋嘛！」曬足全程的游嘉欣見對方如此爽爆得戚，即忍不住炮轟：「頭先真係辣Pat Pat，見佢哋除口罩時，個個塊面都紅卜卜！」另外，談到與嘉欣於《你》劇再合作，並將有被對方施針的對手戲，廣沛大爆對方烏龍事：「見佢第一次試針，我真係『感動』到流眼淚，因為佢成支針唔見咗！」嘉欣即辯稱：「最尾發現支針原來喺我自己個肚度拮住咗，所以大家明白佢點解喊啦，係驚到喊！」