「息影」一年睇清楚老婆 劉青雲危站急流 靠威吔保命

青雲與韋導早前接受訪問，大談拍攝點滴，新片既要跳樓又要爬車頂，問青雲是否從影以來最辛苦之作？他說：「辛苦係精神上，因為角色幾複雜。最辛苦係跳海，我着住5、6件衫，落水後等擺機位，我個人開始沉，10幾分鐘入面要不斷咁游，一郁所有嘢都抽住。」而開場跳水渠一幕，大隊移師內地一個急流地方取景，水流太強令他無法站立，要吊威吔協助，他笑言一不小心，分分鐘直接被沖返香港。

青雲在片中經常與空氣演對手戲，問在家練習時有否嚇親太太郭藹明？他笑說：「佢習慣咗，我好多時都係諗緊嘢，大部分演員都係不斷思考角色。（難抽離？）我唔去分，有啲嘢自己融化，或者係帶唔走嘅。」被韋導形容為「犀利演員」，青雲謙稱並非「神級」：「撞到叻嘅人先有咁嘅演技，我唔敢講一定會做得好，但唔好睇劇本，決定點去演先睇，希望有少少嘢刺激到自己。」

疫情持續兩年多，青雲坦言有一年時間零工作，他幽默說：「從來冇咁長時間對住太太，睇清楚娶咗個咩人，係個好女人！（有冇掛住拍戲？）初初冇，曾經諗過就咁唔做添！後來時間愈耐，有時間睇劇，覺得自己又返嚟喇！」

韋導讚青雲經常有深刻表現：「呢個演員唔只做到要求，仲幫到你創作，所以唔好咁便宜佢，要拍啲嘢令佢都覺得難，唔係留難，係觀眾都想睇。（角色非佢莫屬？）如果換另一個，會浪費好多時間，搵咗主角要不停教佢演戲係災難，我創作嘅方法係冇劇本，佢接受咗可以馬上畀番啲嘢你，好難搵到另一位演員咁樣！」