候選港姐 孖住睇夜景 徐麟爆炸力不再 密冚新髮型

今年港姐佳麗質素平均，大熱門有星二代林鈺洧、連詩雅師妹邢慧敏及被爆跟無綫高層樂易玲關係密切的張光怡等，當中爆冷入圍的博士生徐麟以其出位爆炸頭亦是話題焦點，可惜入圍後招牌頭被消失，雖然口口聲聲表示不介意，但早前出席完活動，即以超大帽收埋新髮型，就知她相當懷念當日的爆炸look。

當日徐麟相約年紀最細的19歲佳麗林泳怡夜遊尖沙咀，兩女以黑白雙煞造型自由行，先往附近餐廳醫肚，然後就出發去海旁拍照，原來是等睇幻彩燈飾。兩女沿途興高采烈，不時指住夜景讚嘆，其中有肉地的林泳怡突然除下外套，露出性感小背心，徐麟反而相當保守，全程包到實。之後她們分道揚鑣乘港鐵離開，徐麟家住西半山豪宅地段，據知兩年前她由內地來港讀書，為方便往返大學，一直居住上址。

至於張光怡被爆其母親與樂易玲為好友，樂易玲受訪時表示：「一啲都唔奇，我年年都會四出去搵靚女……朋友的、朋友的朋友的、公司藝人、模特兒公司等，都會游說。」覺得世姪女的質素如何？她說：「佢質素唔錯，其實今年入圍佳麗質素都好高。（會唔會擔心因為你哋認識，會被人質疑有所便利？）跟每年一樣，我哋面試嘅評委都有7、8位。」