連詩雅籌備婚禮 預咗有摩擦

藝人連詩雅（Shiga）、雲浩影、艾妮及洪助昇昨日在新蒲崗出席《MIKIKI．Summer Skycation》揭幕禮，由Kawaii與嚴崇天擔任主持，期間大會送上蛋糕為Shiga及雲浩影補祝生日，眾人及後聯同新鴻基地產（銷售及租賃）代理有限公司租務副總經理吳小偉主持啟動儀式，吸引不少市民圍觀。

由於未婚夫陳家樂最近在內地拍戲搵老婆本，Shiga要擔當起「母職」到男友家照顧其愛犬，被問到可希望及早生BB做媽媽？她說：「唔會咁快啦，婚期都未有，同埋處理婚禮都要好多精力，見朋友處理婚禮都會有摩擦。佢唔喺香港，我哋未傾，坦白講，兩個人一齊就唔會冇摩擦，不過我哋搵到一個健康方法去冷靜解決，我哋都唔鍾意衝突，開始有摩擦時就會冷靜咗先再傾。」

對於先「試婚」同居以便適應婚後生活？Shiga說：「因為我阿媽得我一個女，佢唔鍾意，唔想我結婚之前同居，所以好多人都唔信我咁多年來都冇（同男友）同居過。媽咪係一個好開明嘅人，情侶之間去對方屋企、旅行佢都會諒解，只係一齊住就唔得。」

提到陳家樂要在內地工作逗留兩、三個月，2人要靠視像保持見面，Shiga說：「唔係第一次分隔，平時會約埋一齊視像食飯，或者一齊同步睇電影。」笑問2人可會相約「鴛鴦戲水」？她即說：「梗係唔會！喺網絡世界，你拎住個電話去沖涼，除咗對方，唔知會有幾多百萬人喺大氣電波睇到，所以真係好危險。」講到師妹邢慧敏成為候選港姐大熱門，她讚對方是有愛心的女仔，寄語她保持自信及笑容。