除剩內衣行臭渠 阿Sa公路飛車 險撞死劉青雲

阿Sa於英皇電影《神探大戰》飾演女幹探，嘗試多個第一次！一向欣賞導演韋家輝的她，當初只知演甚麼角色及簡單故事，直至開拍後，每次到場才知演甚麼，感覺刺激，又指每場戲都似玩極限運動，笑言拍完該片後，身體比以前更健康。

她透露很難忘僅穿內衣、被保鮮紙包頭逃亡的戲份：「我未試過跳海，全身化一個特技妝，每次要花6至8個鐘，然後要走一條好臭嘅渠，嗰條渠真係『包羅萬有』！仲有無數爆破場面，有啲好貼近就喺自己身邊，返屋企後發現身上有損傷。仲有喺廟街跳樓，好多人喺樓下睇住。」

她又稱有懷孕戲份，故事前特別揣摩孕婦的舉止。雖然她一向冇有怕，不過拍攝飛車場面時卻冒出冷汗，她說：「要我揸車已經係一個好難嘅任務，仲要似賽車手，有一場真係差啲喺公路撞死青雲！又要揸車又要演戲，甚至睇唔到倒後鏡，因為裝咗燈，我真係睇得好勉強，一轉彎差啲就撞上另一架車！驚魂未定再揸咗一陣，又幾乎Cut線撞車，我完全冇出聲，青雲都好冷靜，然後停喺紅綠燈，我望住佢有啲心虛，佢又望住我，然後爆笑。喺我哋架車前面係Crew車，車內工作人員目睹成個案發經過都一齊爆笑，因為差啲撞死影帝，好驚！」