被公審呃飲呃食 林利認無力行房 住酒店避老婆

林利與台灣太太Erin曾傳婚變，女方經常在社交網公審老公。日前她於社交網公開與老公的對話影片，疑帶醉向林利發脾氣，大罵他呃飲呃食，埋怨林利沒給她鑽戒及婚禮。林利則反罵太太經常飲醉，希望對方成熟點，並反駁太太指他呃飲呃食：「我住你家，我沒有幫你付錢嗎？」最後Erin拋下一句：「那我們到此為止！」影片隨後被刪除。

林利昨日透過長途電話表示：「我都唔知佢想點？我又冇做錯啲乜嘢！佢最鍾意做呢啲（公審），最憎佢成日恐嚇話要造我新聞。」他透露東湖房子的首期是太太出錢，但他有付貸款，還幫太太還卡數，並暗示Erin有酗酒問題：「佢同啲朋友飲天光，唔天光唔返嚟！」談到2人性生活，他直指沒有愛哪有性：「真係冇力，冇咁嘅心情，處於一個警惕狀態。」他自爆日前遭患嚴重精神病的外母拿刀襲擊，要報警及到醫院治療：「外母成日要攞錢，唔畀錢話自殺又話燒屋，瞓喺度都驚！」

目前搬到酒店居住的他說：「我唔想同佢嘈，我好平靜睇化咗，我唔係好有錢，但過日子冇問題，佢話要走就走。根本係好小事，對佢仲係有心、仲愛佢，佢唔係一個壞女人。我同情佢遭遇，佢單親家庭長大，阿媽又咁，始終有影響，佢一飲醉就變咗另一個人。」他指婚姻不是兒戲，跟太太都沒提出過離婚：「等佢冷靜吓先，不過佢好大女人，唔會認錯。佢知自己唔啱，所以先刪咗條片，我搬去酒店都搬過幾次啦，每次返去佢當冇事發生。如果佢想分開就分開，我順其自然。」