朱晨麗邀對手試底線 鄭嘉穎肉搏陳靜講條件 絕不抄牌

嘉穎、朱晨麗（朱朱）及陳靜在主演新片《焚身》上演一段三角關係，劇情交代精神出現問題的陳靜在情路上有摧毀性傾向，戀上人夫嘉穎後情況愈益嚴重，甚至迷暈其妻朱朱，意圖在她身邊與嘉穎發生關係，意識大膽！

《焚》片意欲向1987年荷里活經典作《孽緣》致敬，嘉穎坦言當初對這個新挑戰躍躍欲試，惟與陳靜在龬琴邊的親熱演出則要嚴肅處理：「男演員拍呢啲戲一定比女演員尷尬，如果當場加嘢會畀人覺得有問題，所以預先要同對手講得清清楚楚，唔想有不必要誤會。（盡量避免再拍呢類戲？）做演員好被動，冇理由畀框框自己只接某類型嘅戲。」

談到與異性接觸，嘉穎笑指婚後是異性絕緣體：「好似今次同佢哋（朱朱及陳靜）合作，我哋冇交換聯絡電話，根本冇需要嘛！（試過遇上癡戀女？）冇，非常唔想，呢個係男人嘅噩夢。我依家係個好悶嘅人，工作、打波同湊仔，同我做朋友冇趣味。（刪晒異性嘅電話？）咁又冇需要，知道對方係邊個，可以唔聽㗎。（老婆好放心？）希望啦，咁我日日喺屋企，仲做啲乜嘢呢？」

陳靜大讚嘉穎專業，又願意與後輩溝通，感激今次如願，終可豁出去演精神病患者。戲內愛得徹底的她，現實生活中卻相當理智：「所謂遇上渣男，可能都係細個嘅時候，依家諗番各人都有難處同苦衷。依家睇開好多，我比較期待將來嘅另一半。」而朱朱開始闖影壇，坦言希望日後有機會挑戰類似陳靜片中的角色：「演電視嘅尺度冇咁大，喺電影上希望大家畀多啲機會我。（你嘅尺度可以去到邊？）可以好闊，但未有人夠膽嚟試！」