陳凱琳慶生心情靚 鄭嘉穎封嘴停戰 唔畀林作得逞

Grace與Derek的長相與父母南轅北轍，經常引起網民熱話，尤其近日Derek於社交網上載與陳父合照後竟引發風波，「抽水王」林作出價100萬叫Derek去驗DNA。雖然隨即被粉絲鬧爆，但林作依然死撐，昨日更揚言「有重大消息即將公布」，不過一直只聞樓梯響。

身為陳家女婿的鄭嘉穎昨晚出席主演電影《焚身》首映禮，談到林作抽水，他說：「絕對冇破壞我哋嘅心情，當事人（指Grace兩姊弟）同屋企人心情都好正常。（大家姐Joyce話出100萬驗DNA太少嘞！）呢啲好個人觀感，每個人都可以有唔同嘅睇法。（林作話要向佢阿媽籌旗喎。）本人覺得佢咩目的，大家應該好清楚，唔回應就係最好嘅回應，再問我一百次都係咁答，如果唔係答完又繼續，何必呢？（總之唔理佢？）都係唔回應嘞。（佢無風起浪？）大家自然有自己嘅觀感，總之事件對我哋冇影響！」

當被問到如何與Grace慶祝生日，嘉穎說：「我哋每年都去同一間餐廳食飯，已經7年嘞，希望繼續秉承呢樣2人世界嘅傳統落去。（送乜禮物畀太太？）未買喎，我唔係浪漫嘅人，大家都好實際，平時見到啱對方嘅嘢就會買。（趁生日再追B？）唔使等生日先呀？咁咪一年先得一次開心？（生多個？）你問我老婆啦。」由於要湊仔，Grace未有陪老公出席首映禮，嘉穎透露稍後會陪太太入場欣賞。談到與陳靜的親熱戲，會否擔心惹起太太呷醋，他說：「你哋（記者）唔好畀個窿我踩落去，導演話場戲剪得好好，到時我喺佢隔籬，可以撳住佢嘅。」

至於Grace至今仍未有就「林作事件」作出回應，但卻於社交平台上載預祝今日生日的短片，只見她準備海鮮美食，大搞80年代主題生日派對，嘉穎及兩名兒子被攝入其中，公開放閃！不少網民留言大讚她靚女，但同時亦有人指她此舉似企圖轉移大家的視線。

另外，林作與Joyce於社交網「互動」，當後者指「100萬出手太少」，林作即寫道：「其實多年前，我為了探究究竟佢哋係咪親生，而用我自己私人帳戶add咗佢，佢嘅意思係願意做test，但價格出手太低！明白嘅，始終我用緊自己錢，人哋講緊家族顯赫…本人馬上聯絡身在深圳嘅林母，睇吓佢可否返嚟幫拖。」