23新生代「J2ers」鬥搏命 陳欣茵仆「身」仆命 胡美貽留疤小犧牲

C君昨日在西九主持《J2再出世》接生大會，隆重宣布J2台更換台徽，席上介紹18個全新節目，包括較冷門的鬼故及性節目，並將於「6．20」啟播。

他又率領23位年輕新生代「J2ers」登場，包括胡美貽、陳欣茵、黃嘉雯、廖慧儀、涂毓麟等，全經他與幕後監製逐個面試，直言將來會汰弱留強，可能加入新人。他形容現時並非電視大戰，而是電視大賽，對友台抱尊重、欣賞及互相認識的態度。他指J2台剛起步，友台已行得好遠，所以對收視冇壓力，希望能贏口碑，又自嘲只是「創意看更」，而他睇好《喂喂喂 你話你係邊個邊個》和《CP訓練營》兩個新節目。

胡美貽（Nicole）與陳欣茵（Sonya）偕一眾「J2ers」上台自白，每人拿着一件物品，代表要放下舊的自己。剪了一頭短髮的Nicole手持頭髮上台，表示要放棄長髮造型；Sonya則表示要放下包袱。在台上大合照時，Sonya不慎跌倒，多位男士即上前扶起她，她笑說因放下包袱，突然一身輕衝上台，為J2「仆心仆命」，雖然Chok親頸，但開心感受到愛。

而Nicole主持兩個新節目《鋪鋪Poker》和《港女野人》，當中拍《鋪》期間被方力申所傷，導致頭部要縫針。她透露傷口有一節尾指長度，疤痕尚未消退，希望不會留疤，但不算為節目大犧牲，而今次剪髮全因要開劇，亦想以新形象示人。

另外，主持不同節目的洪永城與太太梁諾妍，以襯到絕的「夫妻裝」亮相，梁諾妍希望有機會與老公合作，但洪永城抵死表示已日見夜見，不想開工又見面，但亦希望做育嬰節目交流心得。