近水樓台先得「醫」 蔡思貝拍劇自肥 乘機啪頸針灸

蔡思貝、何廣沛、游嘉欣、陳嘉慧及關嘉敏等昨午現身電視城，出席新劇《你好，我的大夫》開鏡拜神。劇集開拍前，思貝等主角曾跟中醫上堂學習針灸，何廣沛更打趣自稱是把脈高手。談到醫術問題，何廣沛透露：「我試過畀游嘉欣施針，真係好緊張，知道佢拮落嚟嗰吓眼有淚光，好似肉隨砧板上，好彩佢落針都好準確。」

思貝指拍攝期間有中醫顧問跟場，大家把握機會「謀福利」：「我之前撞傷過，成日都會有頭痛，拍劇期間曾經搵醫師啪吓條頸，後來放消夜又試過針灸。」談到今次拍攝，她坦言由於中醫的專有名詞繁多，背誦對白相當吃力，何廣沛則形容如記古文般。思貝又說：「其實我媽咪曾經學過中醫，不過只係初步，但依家我可以同佢喺呢方面多咗溝通，拉近咗大家嘅距離。」

至於陳嘉慧與許俊豪（Lincoln）早前傳出緋聞，開鏡時難得大方合照，不過異口同聲繼續強調只是朋友關係。Lincoln大讚嘉慧是「好女仔」，但坦言：「都係工作先啦，以我嚟講好難得有機會拍劇，其實我哋見面都只係講工作多。」嘉慧則說：「之前我哋多次合作，好似《法言人》同《法政先鋒V》咁，係多咗見面機會。我哋之前合作唱歌，啲網民都好受落。」問到Lincoln是否她心目中「那杯茶」？她起初扮聽唔明，及後才答：「Super Tiger成員喎，應該好多人仰慕佢，我驚畀人鬧。（你做老虎乸加入吖？）都好喎！」