戀Hayley疑「見光死」 湯告魯斯翻撻又閃分

今年59歲的靚佬湯與40歲的Hayley於2020年合作拍攝《職業特工隊：死亡清算上集》（Mission：Impossible-Dead Reckoning Part One）時撻着，去年9月曾分手，最近傳出翻撻，上月Hayley更出席靚佬湯另一新片《壯志凌雲：獨行俠》（Top Gun：Maverick）的倫敦首映禮，以示支持。

不過，知情者透露他們已經分手：「湯同Hayley關係係真嘅。雖然有啲傳聞認為佢哋拍拖係為咗公關，事實上唔止係咁，可惜佢哋冇辦法一齊。佢哋好夾，好有化學作用，所以今年先決定再試多次一齊，但地下情成功，唔代表曝光後會成功，佢哋成為一對後引爆咗太多花邊新聞，所以決定做番朋友比較好。」

另外，《壯》片大收旺場，令靚佬湯成為網絡熱話，他的科學教徒身份被離教的圈中人再度提起。51歲美國女星Leah Remini於社交網引述友人批判靚佬湯的文章，表示：「多謝我好朋友Claire Headley挺身而出嘅勇氣。雖然科學教不停咁攻擊你，你都仍然繼續發聲批判。正如Claire喺佢篇文所講，湯告魯斯好清楚知道科學教嘅所作所為，唔好畀佢嘅巨星魅力呃到你。」

Claire於文章指靚佬湯犯下「反人類罪行」：「你覺得咁講好極端？破壞人家庭係一種反人類罪行，我係咁認為。問吓自己：湯對上一次同佢唯一親生女兒蘇莉（Suri）講嘢係幾時？記唔記得佢前妻姬蒂賀姆絲（Katie Holmes）千辛萬苦先可以脫離佢同科學家嘅掌控？湯告魯斯推廣一個危險嘅邪教，亦破壞咗我家庭，差啲令我冇咗婚姻同條命。」