環境狹窄 着厚衫上床 胡杏兒譚耀文滴住汗溫馨

譚耀文（阿譚）、胡杏兒、陳家樂、連詩雅及周柏豪等主演回歸劇《獅子山下的故事》（前名《獅子山下．晴》）搶閘推出，安排今晚於內地中央一台首播。近日劇組發布約3分鐘的預告片，驚喜出現「雙主題曲」，其中內地著名歌手孫楠翻唱羅文首本名曲《獅子山下》，字正腔圓引起網民熱議。

該劇以香港茶餐廳為故事骨幹，橫跨兩代情。阿譚與杏兒飾演夫婦，女方由18演到65歲，成功挑戰演技。談到與杏兒的溫馨床戲，阿譚笑言：「大家都係專業演員，合作得好愉快。拍嘅時候間屋好細，尤其我哋兩個同個小朋友手牽手瞓嗰場戲，除咗逼咗好多人，大家仲着好厚嘅戲服，真係滴住汗嚟溫馨！」

飾演茶餐廳老闆娘的杏兒表示：「茶餐廳係草根香港文化，人情味濃。開工前我特登去唔同嘅茶餐廳做資料搜集，觀察點樣運作。」她非常欣賞「老公」阿譚：「佢嘅工作態度正好代表獅子山精神，其實我都有留意佢當年參加新秀嘅表現，唱完仲要嚟一個後空翻，精彩妙絕！」

預告片中，李治廷受辱遭人用紅酒淋頭，家樂與柏豪則艷福無邊，分別與女拍檔有咀戲，但「錯點鴛鴦」，連詩雅拋低家樂跟柏豪談情。談到拍攝難忘事，家樂表示：「計埋隔離，今次離港兩個幾月。我好記得北上前有75kg，但返香港嗰陣得番68kg，之前儲落嘅肥膏同肌肉全部消失晒。可能首次拍內地劇，有種無形嘅壓力想做好啲，所以搞到冇咩胃口。劇中我同謝君豪演兩父子，佢係我好欣賞嘅前輩，估唔到佢原來好搞笑，每次出現都令氣氛變好。」