吳浩康陪入產房剪臍帶

歌手吳浩康（Deep）日前為音樂節目《Chill Club》錄影，初次與樂隊Yusobeit夾band，雖然現場冷氣充足，但各人均錄到身水身汗。Deep於後台說：「錄到底褲都濕埋，好正、好熱血！」他又趁機向Yusobeit的結他手Andy取經，為將為人父作準備，Deep說：「佢結咗婚做咗爸爸，梗係要交流吓，問吓佢點樣協調太太同自己嘅生活。」談到太太郭思琳預產期是9月，他已計劃陪入產房兼剪臍帶：「依家未係太緊張。」對於太太早前差點暈倒於街頭，他說：「依家盡量少啲畀佢一個人出街，佢個肚好大，出街可免則免。」