相隔22年合力「打大佬」 城城壓腿加操 再戰吳鎮宇

城城、鎮宇、任達華及方中信等昨日出席英皇電影《內幕》開鏡拜神，今次是城城自電影《公元2000》後再與鎮宇合作，他說：「相隔整整22年，不過我有睇佢嘅《濁水漂流》，演得好好。而我同導演麥兆輝上一次合作係1996年《浪漫風暴》，最開心係好多新知舊雨喺埋一齊。」

城城片中扮演專打刑事案的大狀，與飾演警察的鎮宇合力「打大佬」：「戲裏面我除咗打官司外，仲要教小朋友跆拳道，所以呢排努力咁壓吓腿。戲內我同鎮宇起初都唔Friend，但今晚我就會同佢喺呢度（開鏡地點）打壞人，希望呢場戲7日完工。」

鎮宇早前已拍攝了一場「屋頂穿梭戲」，搞到要休息整整一星期才能回氣，故他笑指這場「捉壞人戲」要交由替身代勞。對於角色原本由林峯出演，後來考慮陳偉霆，最終落入他手中，鎮宇說：「冇所謂，我都係因為鍾意呢個組合，同埋可以留喺香港開工，最緊要準時出糧啫！佢哋（劇組）用咗好多說話嚟安慰我，我都同佢哋講唔使喇！」

周勵淇（Niki）、湯怡及李靖筠今次亦有份參演，Niki演律師，與城城是情侶，但未有親熱戲。她透露剛從內地拍戲返港：「喺內地3個幾月，今次帶埋2歲囝囝去。（佢應該好好玩喇！）係，好似諧星。（追多個？）暫時為公司服務先，疫情好轉都要開始履行啲電影合約。」湯怡則是產後復出首部電影，笑言做了媽媽後，拍戲表現比較淡定。

另外，方媛近日上載與老公城城及一對寶貝女兒慶祝端午節的照片，相中她與城城在餐廳自拍，甜蜜放閃。當天行程節目相當豐富，一家四口玩水上腳踏船和逛街，城城全程露出慈父樣，大晒溫馨。