35萬會員癡心錯付 嬲爆收檔 「前夫」轟MIRROR演唱會當鏡粉水魚

MIRROR演唱會掀起搶飛潮，即使加開兩場及推行實名制，但限於內部認購及贊助商扣飛等因素，致公開發售的門票只有約3.7萬張，加上公開發售當日網絡「大塞車」，不少「鏡粉」花了逾10小時「搏鬥」亦無功而還。吸納逾35萬網民及「前夫」追蹤的社交平台群組「我老婆嫁左比Mirror導致婚姻破裂關注組」，版主前晚宣布因極度不滿演唱會安排，待演唱會結束後會永久關閉群組。

版主表示但凡MIRROR賣廣告、出席活動或出新歌MV，「鏡粉」都出盡心思和財力應援：「鏡粉人肉loop到幾百萬view唔知為乜」、「出新歌，唔使你畀錢宣傳，佢哋自己出錢出力搞應援。」惟演唱會座位表卻是「死亡floor plan」，一票難求，令眾多「鏡粉」及「前夫」極為失望，版主怒轟：「你哋當鏡粉係ATM（自動提款機）係水魚，錢係要賺，但食相唔係咁難睇啩？各位演唱會主辦單位，你哋係咪真係以為啲鏡粉個個都幾億身家？我哋成日鬧黃牛，你哋就自己做最大黃牛。」直至昨午5時，有超過4萬名群組成員讚好支持，另有成員發現有不法網上賭場利用MIRROR作招徠進行詐騙。

而身在美國公幹的姜濤，在網上以歌聲安撫未能成功購票的粉絲，獻唱早前與張敬軒合唱的《斷點》，軒仔留言：「以後唔該包埋暈浪丸畀人」，更化身「姜糖」狂讚姜濤可愛：「點解佢連索鼻水都Cute到尖叫！我當年拍呢首歌MV嘅時候鼻敏感，個鼻輕輕摵咗一下跟住導演都尖叫，不過係尖叫住嗌『Cut！』」

另外，MIRROR成功衝出香港，8月將登陸日本一年一度的SUMMER SONIC音樂祭，主辦單位亦已在官網公布MIRROR是演出嘉賓之一。活動定於8月20、21日分別在東京及大阪舉行，屆時MIRROR會現身東京的Pacific Stage演出。