鑿冰聲激發獸性 黎淑賢遭愛貓襲擊 流血不止

已淡出娛樂圈的黎淑賢（Bonnie）愛貓如命，家中飼養了2隻「小寶貝」，昨日凌晨她竟被其中一隻「主子」襲擊，家中頓變血案現場！她在社交網上載受傷照，見其手、腳、耳後都有恐怖血痕，睇到網民心慌慌！兇徒原來是她飼養的豹貓Moser，她透露愛貓當晚跟着她走入廚房，她熱情地抱起貓咪，殊不知牠對鑿冰的聲音極為驚恐，更失控向她施襲，令她全身體無完膚。

雖然傷痕纍纍，但Bonnie未有發怒：「奴才唔會嬲你㗎！」並幽默地形容傷痕是「520愛的烙印」。由於多個傷口流血不止，她最終要去醫院求醫：「慶幸唔使縫針，但要打破傷風針，包紮好就返屋企休息。」她在網上公開入院用了2,000多元的單據，不過破財擋災，身體無礙已是萬幸。

Bonnie昨日受訪時表示：「身上咁多個傷口，最傷係心口嗰個，雖然唔使縫針，但醫生話處理得唔好會留疤痕，好多朋友都關心我，叫我唔好食呢樣嗰樣。」她指事發時情況混亂：「諗唔到搞到成地冰，因為工人姐姐都瞓晒覺，我咪自己清理，嗰時先發覺好痛，隻手啲血仲係咁滴，因為止唔到血惟有去醫院，但我冇嬲Moser，因為佢都唔係有心。」今日是她與老公的結婚周年，但因為成身傷，她未知會否外出慶祝。