馬德鐘推Job返港谷收視 湯洛雯趕造勢 搞笑贏口碑

馬德鐘、湯洛雯（靚湯）、賴慰玲、陳煒、蔣家旻、何廣沛與徐榮等，昨日在電視城宣傳新劇《雙生陌生人》，眾人為谷收視出盡九牛二虎之力，靚湯自爆早上剛拍完《隱門》外景即趕來；馬德鐘則專程安排返港，不介意失掉工作，完成所有宣傳後才到內地開工。

對於劇集首周收視未如理想，監製林志華坦言失望，因對作品好滿意：「上個禮拜大家有冇出街食飯、約人？我太太話超市冇人買餸，我又覺得香港市面熱鬧番，大家開心番係好事，劇可以遲啲追番嘅。」但他對劇集「後勁」有信心。

馬德鐘認為收視受環境因素影響：「之後嘅劇情會好反轉，好有追看性。」又指收視非演員所能控制，靚湯表示認同，認為口碑最重要：「好多朋友傳訊息畀我，話馬德鐘演兩個角色好搞笑，評語好窩心。」本月6日生日的她，生日飯食唔停，可惜近日患上胃炎，眼見朋友食得開心，她卻只能食粥，非常冇癮！

至於賴慰玲對收視不感壓力，但預告之後將有爆炸性造型登場：「其中一個『最密實的性感』造型，着住全身綠色貼身衫。（身材玲瓏浮凸？）浮唔浮凸自己睇喇！我係拚咗條命去玩。」育有4歲兒子的她透露有意追多個，待完成劇集《婚後事》後，預計明年開始造人大計。提到好友何雁詩臨盆在即，她笑言無法分享經驗：「我都唔記得個仔點生出嚟，我原本順產，臨時緊急開刀，我懷疑自己有腦霧。」