張敬軒紮辮仔做導演體驗似「初夜」

唱而優則演的張敬軒，是樂壇「扮嘢」高手，最愛反串女生去搞笑，兼且進軍KOL界，有「早餐界KOL」之稱，最近軒仔還處男下海，踩過界做導演。他在社交網上載拍攝現場情況，見紮住辮仔的他在場親自主理，不停與工作人員、演員交流，雖然他叫大家猜猜他的「第一次」是做甚麼，但醒目的粉絲及網民輕易就估到，因為他貼上手機電影的各單位名單，獨欠導演一欄，答案早就呼之欲出。

身體某部分充血

軒仔又分享首次執導的經歷，他寫道：「最近，我做咗一單我咁大個仔都冇做過嘅嘢，聽人講第一次，係會好緊張、會手心冒汗、仲會忍唔住嗌咗出嚟、身體某部分仲會充血（個腦），我想話畀大家知係真嘅，事後，會令人好回味，仲會懷住一個好滿足嘅笑容去瞓，依家講番起真係紅都面晒，唔知大家有冇試過呢？」

軒仔表示雖然身處這個年代，好多人早已有執導拍攝的經驗，但他每次聽到「導演」這兩個字，還是會有好大壓力，但又有少少興奮。粉絲洶湧留言，稱他做張大導，指他又做多瓣好勁，但有粉絲卻搞笑留言「初夜」，笑指此乃最符合軒仔所形容的情況，軒仔忍不住笑說：「細路你係咪睇得甜嘢多上癮呀！」