疑對女拍檔行為不當標梅利：只係開玩笑

老牌美國諧星標梅利（Bill Murray）早前拍攝新片《Being Mortal》時，被指對女拍檔作出不當行為，電影被迫停工，女方身份盛傳是演員Keke Palmer。標梅利前日受訪首度交代事件：「我做咗啲我認為係搞笑嘅嘢，但對方唔覺得係。電影公司想做正確嘅事，所以要充分調查，暫時停拍。依家情況係，我哋傾番偈，想和好……我哋係專業，都欣賞對方作品，如果大家唔啱同唔信任，再合作或拍戲就冇意思。」

他續表示：「過去一兩個禮拜我主要係反思。個世界同我係小朋友時好唔同，我細個時覺得好笑嘅嘢，依家唔一定再係好笑。啲嘢會隨住時間改變，所以對我嚟講重要嘅係去了解。」