全家確診 壓力沉重 何嘉莉放下歌手夢 轉型自強

做完演唱會之後，Lillian確是重拾舞台熱情，可是仍不改轉型的決心，她說：「覺得可以做一啲嘢，為女性發聲，發出正面訊息。有時睇到新聞，有啲女士抵受唔住家庭壓力，終釀成慘劇。」

早前疫情第5波來襲，Lillian一家五口逐個確診，照顧家人令她飽受壓力，加速她變成強人：「大女最先中，我堅守到最後一個，希望照顧好佢哋，每日喺屋企戴住口罩，洗手洗到爛。」她透露細女的病況最令她擔心：「佢發咗3日高燒及有幻覺，話見到間房有Monster，瞓喺床以為自己跌，要我扶住，我心都好驚，好彩冇事。」

經歷全家染疫這半個月驚心動魄的日子，令Lillian一度好迷失，她說：「知道自己要去釋放，唔好再鑽牛角尖，本身我都係一個多愁善感嘅人，會諗好多嘢。」她會透過時裝和畫畫來抒發情緒，例如着一件顏色鮮艷的衫，令自己放鬆，早前報讀學習深呼吸課程，提醒自己紓緩緊張心情。

疫下航班大受影響，早前其任職飛機師的丈夫Gerald Sze被削減一半人工，他們又要照顧分別9歲、4歲和3歲仔女，生活擔子很重，慶幸夫婦均很正面對抗逆境：「佢仲飛緊，一定係飛少咗，每月都返緊工嘅。以前佢飛得多啲，細路又返全日學，疫下唔同咗，大家喺屋企多咗，初時係好多爭拗，大問題就冇，要互相遷就。」她覺得最感動是小朋友之間經慢慢磨合後，現在感情變得更融洽。