Lokman AK聽教聽話晒肌開戰

MIRROR成員Anson Kong（AK）繼劇集《打天下》後，近日與隊友Lokman、Tiger及Alton等，一同為由同名漫畫改編的ViuTV新劇《死角》演出。4子前晚與藝人羅浩銘、梁祖堯、周國賢等齊集觀塘海濱花園為劇集開工，除於現場搭建擂台景外，亦邀請了數百「鏡粉」一同參與拍攝，加上場外粉絲及路過街坊，場面墟冚。

場口講述AK與同門師兄弟Lokman於擂台對戰，爭奪「明日世紀」戶外拳賽冠軍寶座。身為劇集武術指導的羅浩銘，一直在場邊指導兩子出拳動作及如何閃避走位，AK與Lokman亦聽教聽話認真練習，趁拍攝空檔即試做動作，不敢怠慢。操得一身肌肉的兩人不論在外形及動作上，亦似足真正拳手，可謂睇得又打得。

答謝粉絲幫手

至於一同參與拍攝的鏡粉們，能近距離與偶像接觸固然興奮，拍足幾小時亦毫無怨言。而4子亦相當識做，於拍攝尾聲時齊齊上台感謝粉絲及與他們來個大合照。