鄧健泓突認偷食被鬧爆 李施嬅笑舊愛低能 自嘲阻住晒

無綫劇集《金宵大廈2》演員陳山聰、李施嬅、張彥博、連詩雅等，昨日在將軍澳電視城宣傳。日前鄧健泓在網上節目自爆當年背住李施嬅偷追石詠莉，被網民轟渣男，施嬅大方說：「當時唔知，如果知道佢（石詠莉）會做咗佢老婆，當時就叫佢快啲搵佢（石詠莉），我唔好阻住晒！我都唔差，但佢都去Flirt人，即係佢（石詠莉）都幾好、幾有緣啦！」

施嬅叫大家不要介懷：「我依家都有個咁正嘅，好多嘢都唔記得晒喇！（鄧健泓虧欠你？）好多事大家唔清楚，依家佢（石詠莉）都做咗佢老婆啦！我覺得OK嘅。（重提舊事影響到你？）冇，我哋仲係朋友，但覺得佢好低能囉！點解會去講啲嘢畀人鬧呢！哈哈！」又強調當年分手全因性格不合，與石詠莉無關。

另外，通訊事務管理局接獲36宗有關《金宵2》的投訴，指內容令人驚恐及有種族歧視之嫌，山聰說：「第一集已經驚嚇，相信第一集就收到投訴，《金宵2》唔係合家歡嘅劇，係另類劇集。」施嬅則覺得劇集相當破格，觀眾要時間適應，她笑說：「今次Budget多咗，套劇嘅電腦特效、化妝都好逼真，我都驚驚哋。」

連詩雅以一襲火紅旗袍宣傳主演單元《嫁衣》，事前特地「絕食」24小時，以免肚腩仔現形，但出場前發生奇怪事，換衫後門鎖離奇反鎖，以致被困10分鐘。