命中注定 避無可避 唐詩詠男友出軌 求神拜佛趕小三

曾跟崔建邦及洪永城拍拖的唐詩詠有「絕世好女友」之稱，日前她為連詩雅及蝦頭主持的網上節目擔任嘉賓，分享做「好女友」的標準。她自言雖愛向另一半撒嬌，但不相信「撒嬌女人最好命」的道理，因為撒嬌不代表有效防止小三埋身：「你做得幾好，佢都會有小三，要有就有㗎喇。」

面對小三來襲，唐詩詠自爆用盡方法「抗敵」：「講真我咩方法都試過，帶佢去拜神，我就求佢要好愛我囉。」不過即使成功擊退小三，不代表跟另一半的關係可以走到最後，她說：「當有小三嘅時候，你會跌入個窿度，你淨係諗：『小三快啲走啦』或者『你返嚟我度啦！』但係忘記咗最重要嗰樣嘢，就係其實你咁嘅狀態冇人會愛你囉。你只要生活得好好，或者你好開心，嗰個人係留定係走佢會選擇，唔係輪到你去避佢。或者你做所有嘢去避嗰個小三係冇可能，因為生命中佢會出現就一定會出現，而嗰個男人要選擇佢，始終都會選擇佢。」

節目中，蝦頭和連詩雅讚唐詩詠溫柔知性，是最吸引男士的類型，不過唐詩詠認為要有「媽媽」的特質才吸引：「咩類型嘅男人都係一個小朋友，你需要好似一個媽媽咁去照顧佢嘅感受，你要呵護佢，其實我覺得係有啲攰嘅，但呢個係必須，因為我發現如果你冇呢一樣嘢，佢哋好多時候會覺得被忽略，但係如果你用咗啲tone唔啱，佢又會覺得你煩。」