港姐50周年 期待出埠拍攝 宋宛穎細妹接棒 壯大「選美世家」

今年港姐招募記者會昨假電視城舉行，大會將主題定為「時代在變 美麗不變」，報名日期由即日開始。一眾港姐出身的馮盈盈、劉穎鏇、宋宛穎、邵初、黃嘉雯等齊齊現身協助造勢，無綫總經理（節目內容營運）曾志偉則到場主持啟動儀式。

應屆港姐宋宛穎及邵初對於行將卸任，同感不捨，宋宛穎表示：「我覺得好似尋日先遞報名表，時間過得好快。好多人知道我有個孖生細妹，就叫我游說佢參選，不過佢好怕醜，如果連佢都選埋，加埋我同媽咪，咁就真係睇吓係唔係選美世家嘞！（妹妹生得似你？）兩個樣嚟㗎，我哋係異卵雙生。」邵初談到當選後最難忘的經歷：「就係參加抗疫活動，到訪過確診家庭，明白香港人呢段時間有幾艱難。」

至於卸任後是否準備於演藝圈大展拳腳，她們均表示希望有新嘗試例如拍劇。

曾志偉過往曾擔任21屆港姐決賽司儀，他謂：「諗都冇諗過，今年適逢港姐50周年、TVB又55周年，再加上慧妍雅集40周年。以往我習慣第一日就同啲佳麗會面，叫佢哋好好享受呢段難忘嘅回憶，唔好爾虞我詐。」

他透露比賽暫定於8月底或9月舉行，希望疫情減退，可開放出入境出埠拍攝，也希望趁着50周年多邀重量級嘉賓助陣。至於《金宵大廈2》「姐姐」單元被指涉及種族歧視，他謂：「如果拍戲講外星人，我哋搵人扮外星人又係歧視咩？只係根據劇情需要。」