「復活」谷劇呃晒全場！ 李施嬅鴛鴦眼未愈 或要再做手術

無綫劇集《金宵大廈2》演員陳山聰、趙希洛、湯洛雯等昨日在將軍澳出席復活節宣傳活動，女主角李施嬅因免疫系統疾病一直未能現身谷劇，正當大家嘗試透過視像與她見面時，她竟突然出現，給眾人一個驚喜！

戴上兩個口罩及太陽眼鏡的施嬅，坦言大家事前不知道她會出現，連好姊妹趙希洛也呃埋。談到病情，她透露已康復8成，但眼睛有可能要再做手術，她說：「依家精神好好，呢排日日做運動，狀態、指數都好，抵抗力亦好番好多，只係隻眼未變番正常咁靚，所以唔敢見人。（完全復工？）都未係百分百，等個樣回復番正常先，健康、視力都冇問題，只係仲有啲大細眼。」又指患病期間，未婚夫給予很大激勵及正能量，總好過攬住喊。

好姊妹趙希洛也被蒙在鼓裏，她笑說：「尋晚先同佢講完電話，連我都呃埋，咁好演技，要請我食飯喇！」她在主演單元《對倒》有浮誇演出，她說：「未試過咁嘅演出，今次角色好瘋狂、好狂野，用咗好多時間準備，淨係笑聲都練咗4種畀監製揀。」

至於前晚在《金宵2》網上音樂會獻唱的山聰，被問是否有意再戰樂壇？他笑說：「唔敢諗，太多高手，我作嘢就叻，作曲就唔叻，都係專心做演員。」