唔發癲改做浮誇律師 趙希洛「捱打」驚毀容 要黃建東養一世

趙希洛於《金宵2》飾演的大律師角色貫穿全劇，但她與黃建東於單元「對倒」的人物性格卻180度大轉變：「其實『何太』（首輯《金宵》中的角色）都唔係咁癲，只係恐怖啫，不過喺（今次）單元入面嗰個平行時空嘅角色就好狂野，誇張程度一嚟就去到100，唔怕觀眾將角色同『何太』比較，只要睇唔到我係『趙希洛』就得！角色係入行以嚟同自己性格最大差距，化妝、服裝都好唔同，自己仲設計咗彩蛋，就係戚戚哋個嘴，唔笑都好似笑咁。」

講到劇中被「虐打」，拍攝期間不慎受傷入院的趙希洛，大爆「摧花者」正是拍檔黃建東：「有場戲由朝打到晚，搞到全身傷晒，最記得佢用道具鐵板打落嚟，突然我覺得自己好似拍慢鏡咁跌咗落個鐵堆度，起番身隻腳腫咗要敷冰再繼續拍埋佢，好後悔冇換平底鞋，先至會扭親腳。」問到可擔心整傷臉，她笑說：「鐵板有鈎，如果有乜事，佢要養我一世，但我唔會嫁畀佢。」之後又曾因被「打」到攰，收工駕車回家時險釀車禍，相當驚險。

憑《金宵》演癲婆角色贏得「最佳女配角」獎項的她，入行14年未試過當「女一」，覺得做「女主角」要集天時、地利及人和：「我都恨做女一，但有啲怕醜唔會自薦，不過如果畀我揀做『女一』定有發揮嘅『女二』，我一定揀後者。」此外，她的單元「對倒」海報中，除了以黑白為主色調，字體亦刻意反轉，她與黃建東的造型都相當狂野。