與游嘉欣同遭殃 戴祖儀爆周嘉洛「胸器」大殺傷力

周嘉洛、戴祖儀、陳煒等昨日在尖沙咀為無綫劇集《回歸》、《曙光》開工，嘉洛與祖儀在劇中鬥創業創意，但竟然也有不少「動作場面」，祖儀與游嘉欣更相繼「中招」，被殺傷力驚人的嘉洛所傷。

祖儀笑說：「佢係被摑專家，其實劇本冇，喺大家嘅支持下加咗。不過，我都係掂吓佢唔痛嘅，佢傷人嗰啲就好痛，有次佢要捉我隻手就畀佢整損咗。」嘉洛笑說：「呢套劇嘅演員好脆弱，游嘉欣就係一個華麗嘅錯誤，希望佢冇咩大礙，大人有大量。」兩人戲外經常鬥嘴，十足十歡喜冤家，祖儀更驚嘆嘉洛胸肌勁：「唔同佢開工都唔知佢咁大隻，開工發現佢個胸幾大，所以畀佢撞到殺傷力都好大。」

近日丁父憂的陳煒難掩沉痛心情，但拍攝時表現專業，未有太多NG，受訪前透過助手稱不會提及喪禮和婚事，希望集中精神工作。她受訪時透露劇集要趕在7月播出，以迎接香港回歸25年，不過全劇只有15集，下月底應該可以完成拍攝。她自言在1996年參加選美，翌年踏入社會工作至今，可以話這段時間與香港一同成長，每段時刻也歷歷在目，亦會在劇中重現。