口快快爆佗仔吳浩康做老婆奴敢怒不敢言

曾經女友多多的歌手吳浩康徹底被太太郭思琳收服，由浪子變暖男，一切老婆至上，就連太太將來要拍性感、親熱戲也敢怒不敢言。雖然他和太太有協議要保密胎兒性別，但身為獨子的他見吳家有後，一時漏了口風爆將生仔，未知太太會否嬲到扭他耳仔呢？

新婚的英皇歌手吳浩康（Deep）透露太太郭思琳預產期是9月，問到BB性別？他婉拒回答：「只會話仔女都愛，唔會話鍾意男或女，怕BB知道咗後消化唔到，要理佢感覺。」不過他大讚BB令太太性情大變，由易忟憎變得溫馴，卻口快快穿煲：「自從佢佗咗個仔之後，介意嘅嘢完全唔介意。（咁要生多幾個？）聽人話肚裏面嗰個係點，媽媽就會反映出嚟。」又指之前逼太太食營養餐食到喊，全為她健康着想：「佢嗰啲麻辣太過分，怕佢之後辛苦，偶然一次就得。」又分享和胎兒互動：「會命令肚裏面嘅人要記住我咩人，唔好刺激到媽媽，令我難受。」

做手術醫鼻竇炎

Deep自爆之前連為女友買外賣都不肯，現時和父親照顧太太一日三餐之外，一切以妻兒為先，感覺如還債般：「我以前係畀人服侍，依家我冇可能有機會坐喺度，老婆一見到咁就立即畀5個任務我，佢唔使郁。」他直言視太太如女王。問可介意太太再接拍性感或拍親熱戲？直認是大男人的他柴太太台說：「會唔會有人搵呀？唔會諗起佢啦，我從來都介意另一半拍性感戲，不過會支持佢，就算嬲都匿埋一邊黑面。」

相隔一年才推出新歌《見字醫病》原來事出有因，他說：「有嚴重鼻竇炎嘅問題，呢6、7年嚟完全唔可以用鼻抖氣，唱歌、做運動都好辛苦，只可以用口呼吸搞到喘晒氣，最擔心唱歌功力只得5、6成。」不過經過手術，將塞滿兩個鼻孔的息肉清除，現已完全康復。