男人老狗話除就除 陳山聰全裸露股引人追

無綫劇集《金宵大廈2》前晚一集結尾，男主角陳山聰忽然「跌落」金宵大廈天台上，耐人尋味，更於沒有預警之下，赤條條的「露股」瞓身拍攝，今次是他入行以來首次全裸露股示人，認真「股」佢唔到，給觀眾驚喜。

山聰昨日受訪時坦言監製葉鎮輝叫到，他一定照做：「我問都冇問，睇完劇本咪除囉！雖然拍時地下唔可以鋪太多嘢，不過我好放心，男人老狗冇咩怕，好彩佢話係趴喺度，唔係向天瞓！」他又大賣關子，指這場戲相當重要：「大家要繼續睇落去先知點解我要全裸瞓咗喺天台度，今次第二輯觀眾會更加燒腦，大家要追住落去，我明會有唔明嘅地方，但呢個就係《金宵》向來吸引之處，大家鍾意睇都係因為咁，要估、要思考。」問到拍時有否清場？他說：「當時個個都好認真，監製親自落場拍呢場戲，咁又冇咁誇張要清場，正式時我一埋去除咗條毛巾就拍啦！拍完即刻摟番毛巾囉！」問到他首次大犧牲「露股」上陣，想要甚麼回報？他說：「真心講，冇話要咩回報嘅，大家都係為咗個戲，《金宵》迷睇得開心，觀眾睇到我哋有誠意就得。」

而監製葉鎮輝亦說：「山聰點解會全裸喺天台出現？大家睇到最後就會知道㗎喇，因為講少少都會穿橋，到大家睇完晒，我再解釋番畀大家聽佢點解全裸啦！」問到山聰要拍全裸戲有否掙扎？監製說：「我同佢互相信任㗎嘛，我話點佢就點㗎啦，佢完全唔會過問我，話拍就拍。」

前晚李施嬅與趙希洛的好姊妹浸浴戲同樣吸睛，網民更笑言首季演活「搶B狂人」的希洛，今次「正常」演出令他們大感不習慣，期待她盡快露出「瘋狂本色」。