搵肥仔補鐘 Edan單挑跳唱歌直認怯場

組合MIRROR成員Edan去年主要推出抒情歌，今年他一改曲風，推出跳唱新作《Elevator》。他在MV中分飾多角，既做自己，又變身保安、模特兒等，期間他要吊威吔在升降機內揈來揈去。MV還邀請了多位嘉賓客串，包括隊友Anson Lo及Jer、前輩羅家英、阮小儀及導演鄭晉軒，相當熱鬧。

今次首度獨自演繹跳唱作品，Edan坦言感到孤獨又膽怯：「發覺自己喺跳舞上好冇信心，今次搵咗肥仔@ERROR排舞，佢喺我大學時已經係我跳舞老師，不嬲對佢好有信心，但排舞後先發現自己仲有好多動作做得唔夠好，所以拍MV前一晚，肥仔都幫我加操一堂。」雖然補完鐘，但拍攝時，Edan還是第一個出錯，他亦隨即喊停，更搞笑說：「跳錯要即刻出聲，唔好嘥力。」

Anson Lo睇急症痛出靈感

另外，Anson Lo前日在社交網表示日前於工作時發生「小意外」，表示：「搭車前往睇急症醫生嘅車程當中，靈機一閃諗到下一首歌嘅主題，解決咗我最近諗咗好耐嘅難題，當堂由『好痛』變到『好興奮』嘅心情。」但未有交代發生甚麼意外，只謂已康復，叫粉絲不用擔心。