影響視力 無奈停工 李施嬅免疫系統出事：總有一日醫好

李施嬅前日在社交平台上載接受治療的片段，自爆去年經歷大病，9月、10月開始停工，後來接受眼部手術卻未有康復，直到今年初接受另一位眼科醫生治療，證實她患了有關免疫系統疾病，導致免疫系統攻擊眼睛！

昨日她接受電話訪問時透露患上自體免疫性疾病（Autoimmune disease）：「依家情況OK ，起碼知道咩病可以去醫，自己都樂觀，總有一日可以醫好。之前患病心跳得好快、手震、緊張，依家好好多，但係每星期都要接受類固醇注射同埋驗血。」

她坦言因免疫系統出問題，曾影響甲狀腺而消瘦不少，慶幸甲狀腺疾病已痊愈。問到可有影響視力？她說：「依家視力OK ，之前有眼矇、眼乾同眼腫，拍《金宵大廈2》已經有，當時以為辛苦，直至眼好腫先發現問題。（工作暫停損失大？）做唔到嘢就冇損失嘅，因為都冇收入，依家最貴係西醫治療，保險已經買咗最貴嘅plan，以為好有保障，點知只係包手術費，手術後治療就要自己破費。」又稱無奈缺席《金宵2》宣傳，希望大家留意其主唱插曲《相愛萬年》及MV，因該MV是她患病前最後一項工作。

而陳山聰祝福好拍檔施嬅：「佢身體OK，係瘦咗啲，唔出嚟係未夠靚啫，同埋免疫力低，感染就好麻煩，大家勸佢唔好出嚟宣傳，有乜我頂晒佢，最緊要佢早日康復，打勝仗。」