單身有運行！ 江嘉敏獲高層教急才 孖曾志偉做主持

早前江嘉敏與拍拖3年的男友Anthony分手，之後寄情工作，正等待拍攝回歸劇時，被公司安排與曾志偉、錢嘉樂主持節目《講你都唔信》。該節目內容踩界兼出位，每集都有一個主題給嘉賓輪流講故事，讓大家猜測「真定假」，例如薛家燕自爆50年前登台險失身、郭子豪爆何廣沛醉酒後男女都攬等。

對於被委任做主持，性格率直的江嘉敏坦言：「做主持同嘉賓感覺好唔同，直頭係兩回事，準備嘅功課可能比較多，而且好考急才。做演員有劇本，但主持就幾乎冇稿，考臨場發揮，所以我有返去睇其他人點做，同埋有向珍姐（曾勵珍）請教。好彩有志偉哥同嘉樂哥睇住，我都冇咁緊張。」她笑言起初被邀做主持感覺奇怪：「因為幾個主持入面，我嘅經驗係最少，幾乎冇做過，好彩我同拍檔奶仔（方紹聰）合作多次，大家有默契，佢有叫我唔好緊張，盡量放鬆啲。」

對於成為「珍姐新寵」，獲對方親自教導畀貼士，江嘉敏表示：「因為我少經驗，佢都想我做好啲，所以有教吓我！珍姐好好，有時佢睇完playback會畀意見我。」問到曾勵珍有否叮囑她分手後專心工作？她說：「我一向都勤力工作！」

雖然該節目熱鬧又搞笑，不過據知江嘉敏與方紹聰主持3集後，節目便會煞停。監製陳志球受訪時表示：「其實我都覺得可以繼續做落去，等我試吓同老闆（曾志偉）傾吓先。（係咪志偉冇期做呀？）呢個都係一個原因。」