物理治療師跟身 群毆5日未夠慘 譚耀文狠摑13巴自殘

阿譚早前夥拍影帝任達華與任賢齊（小齊）演出新片《邊緣行者》，下月即將在內地上映，據悉他今次不留力瞓身演出，除遭任達華「兜巴星」外，近日網絡又流傳一條短片，身為主角的他自摑足足13次，邊打自己邊「數罪證」，樣子兇狠，睇到觀眾心寒！短片在內地社交網上載不久，即吸引近17萬人次瀏覽，躍登搜尋榜首位。

談到這場自摑戲，阿譚笑說：「自己打自己梗係痛啦！不過係因為太投入而『加料』，我希望出嚟嘅效果令角色更立體、更真實，可以話係為藝術犧牲。」他更打趣「只此一次」：「真係『有今生冇來世』呀！希望有生之年都唔使再自摑同畀人摑啦！」

阿譚動作戲連場，重頭戲更安排他與小齊等大混戰，這場戲足足拍了5日，一眾型男雨中廝殺型爆，但背後有苦自己知，阿譚說：「每日食完早餐就打到食晚飯，瞓醒擘大眼又嚟過，大家都拍到腰痠背痛，好彩有物理治療師跟場，幫大家鬆番幾下。我都算捱得，但諗番轉頭，嗰幾日真係游走於天堂與地獄之間！」但由於前輩洪金寶亦客串「玩埋一份」，阿譚大讚值得：「只係遺憾冇機會向佢請教兩招螳螂手囉！」