撐監製張志明新作 Yanny搵新煮意做「食評家」偷師

前組合Super Girls成員Yanny，與藝員鄺芷凡、梁茵等日前齊撐前無綫監製張志明過檔香港開電視後的頭炮節目《疫境中的餐桌》，節目將聯同星級名廚張錦祥（Ricky）及藝人嘉賓，教大家如何於抗疫期間將家中雪藏食物炮製成一道美食，而節目亦會聯繫了半百商戶，於限定期間推出「25蚊抗疫餐」，與大眾共度時艱。

鄺芷凡無懼泳裝上陣

家族曾經營茶餐廳的Yanny透露，全家對煮食均有興趣，平日出外食飯亦會「食評家」上身，研究別人的烹飪方法，也會把餘下的食物「打包」返家二次創作，炮製另一道新菜式。而被讚口才了得的鄺芷凡今次獲點名擔任節目主持，她笑指曾參與廚藝節目，亦向不少名廚偷師，惟其廚藝一直未達標：「我叫自己做『腦海中的廚神』，試過用廚師食譜煮係煮唔到個手感，睇就好簡單，但真正煮係兩回事。」又指疫情下工作一直延遲，今次是她自農曆新年後首度開工，感到非常難得。對於監製有意打造本地版《3日2夜》，她指雖然擔心泳裝上陣會嚇親人，但仍願大膽嘗試頂硬上。

梁茵買餸唔知價

至於去年底滿約無綫的梁茵，表示父母早前雙雙確診，故她化身「阿四」為家人準備一日三餐，沒料「食米唔知價」，結果被媽咪詐型，她說：「平時好少去街市，真係唔買唔知貴，豆胚成140蚊一斤，豬肉又貴平時幾十蚊。」