陳葦璇跑步休克入ICU

前女子組合As One成員、《全民造星III》亞軍陳葦璇，前日在社交網自爆休克，一度要入ICU（深切治療部），令Fans非常擔心！她透露當日食完晚飯，休息2小時後落街跑步，途中開始面痕，以為生風瘌即折返屋企：「好快全身都好痕，臉已經開始好腫，我行行吓開始暈，好彩男朋友陪我跑。唔夠一分鐘，我已經由暈暈哋但行到，變到要瞓喺地下休克狀態。」男友急忙Call白車將她送院，醫生為她打針後，她恢復知覺並能說話：「佢話我係敏感性休克，雖然未知敏感原係咩，但血壓太低要留院觀察，咁大個女第一次去深切治療部！」昨日她報平安表示經已出院。