一個願摑 一個願捱 任達華譚耀文同日生 有女冧

譚耀文（阿譚）前日剛度過53歲生日，由於疫情關係只能低調與家人慶祝，一對寶貝仔女相當識做，DIY手工禮物給爸爸送驚喜，阿譚即時冧爆！

早前阿譚夥拍任達華及任賢齊（小齊）等演出新片《邊緣行者》，難忘遭任達華無情瘋狂掌摑一幕：「畀影帝一摑再摑我好感動，因為華哥好勁，佢擔心我會內傷，每次個位都好準。佢講笑咁話每打我一次，自己個心都好痛，所以不停呵番我，但我同佢講長痛不如短痛，唔好留手，況且劇情會交代我有仇報，哈哈！」

一向捱得的阿譚坦言今次除遭任達華「毒手」外，還要被小齊追打，所有動作場面交集起來，絕對是從影以來最辛苦的一次：「不過我愈拍愈開心，事關製作好認真，動作戲由飛車、追到上船再飛出公海，仲有文戲畀我發揮！」

而任達華亦於前日67歲生日，任晴佳在社交平台發文祝賀父親：「爸爸生日快樂，你是這個世界上最好、最棒、最獨一無二的好爸爸、祝你生日快樂，永遠愛你！」並上載了多張童年時與父親的生活照，見任達華對住女兒展示出一副冧樣。