唔講你唔知 自認藝術家 周星馳激罕獻聲 「名畫」通屋貼

近年周星馳甚少接受訪問，昨日罕有公開「獻聲」，於「FWENCLUB X 周星馳」活動中展開線上對談，全程以「星爺Style」的幽默方式回答問題。提到日前西班牙藝術家Joan Cornellà推出一系列NFT作品，其中一件作品與周星馳主演的《國產凌凌漆》造型相似，他表示今次「獻聲」是想多謝對方：「佢好明顯細細個就睇我啲戲，係我粉絲嚟，我都好鍾意佢，佢好似阿爾柏仙奴（Al Pacino），可唔可以搵佢客串吓？」引來哄堂大笑。之後主持問NFT對身為創作人的他有何意義？周星馳說：「你當我係創作人？我應該係藝術家喎，但唔好話畀人聽，因為我唔講你都知，知嘅嘢就無謂多講。創作人又好，藝術家又好，NFT有認證版權，我覺得對我哋係好事，好有意義。」再問他有何收藏品？他說：「我有好多梵高、畢加索畫作……嘅相，貼到成屋都係。」

尾聲時，周星馳問大家若他推出NFT，應用哪齣電影的角色？有份參與線上對談的FWENCLUB創辦人SK Lam表示《食神》，周星馳再問哪個角色？但未待對方回應，他便說：「應該係如花，睇你對如花嘅興趣大啲。」

另方面，周星馳愛將林允最近心情大靚，全因她與高至霆主演的年代青春校園劇《光陰裏的故事》於內地收視高企，更獲不少網民讚賞，指她將「陳一朵」角色演得有血有肉，演技進步不少，完美演活90年代的熱血青年努力向上、無負青春的勵志故事！日前林允悉心打扮睇展覽，大讚展品美麗兼有趣。