三角戀食勻男神周秀娜咀黃宗澤冇癮色誘黃浩然

藝人周秀娜（Chrissie）、黃宗澤（Bosco）及黃浩然陷入「三角戀」，浩然更獲Chrissie主動色誘，相信場面會相當火辣！Bosco則表示與Chrissie咀到當「交功課」，似足老夫老妻，激情欠奉。

Chrissie、Bosco及浩然在梁家樹新劇《叠影狙擊》捲入三角關係，一人分飾兩角的Chrissie「艷福無邊」，同時獲兩男神求愛，劇情交代她原本情傾Bosco，卻為了查案而向「Big Boss」浩然埋身。Chrissie與Bosco已多次扮演情侶，曾笑言男方是她「咀得最多的男演員」，而Bosco打趣說：「今次都好多咀戲，咀到導演叫cut，我哋可以即刻分開，然後傾偈講笑，已經冇晒感覺，似足『交功課』。」

Bosco片酬補貼餐廳

飾演反派的浩然第一眼已視Chrissie為自己的理想型，故陷入感情漩渦中互相利用，據悉劇組稍後將安排Chrissie主動色誘他！談到這場重頭戲，浩然坦言：「依家疫情要保持社交距離，所以未拍得住，都要傾吓點拍，暫時唔想劇透太多，只可以話會有驚喜。」問到今次與Chrissie「相遇」，是否令他憶起當初結識太太？他笑說：「當然會有好感，但我哋又冇咁戲劇性囉！」

浩然與Bosco日前在停車場鬥戲，鏡頭前後有講有笑，完全不似「情敵」。Bosco笑言羨慕對方：「佢個角色有心臟病，完全冇動作場面，我就打到條頸有少少整親。」此外，談到其餐廳重開後只做午市，他表示：「好多員工跟咗我好幾年，點都要頂，唔通要人失業咩？大家多啲嚟幫襯囉！（真係蝕過百萬？）一定，好彩呢兩年拍戲我冇停過，可以用片酬嚟補貼。」又直言原本有意繼續開拓飲食生意版圖，現時要暫緩計劃：「之前睇舖，依家梗係要停啦！（疫情後繼續？）望係咁望啦！」